Addis Ababa ITDB - Innovation...

August 22, 2024 - In Technology Trends    0

Addis Ababa ITDB - Innovation and Technology Development Bureau

የእውቅና እና ሽልማት መርሃ-ግብር ተካሄደ

******************************************

ITDB ነሀሴ 16/ 2016ዓ.ም

የአዲስ አበባ ከተማ አስተዳደር ኢኖቬሽንና ቴክኖሎጂ ልማት ቢሮ በ2016 በጀት ዓመት የቅንጅታዊ አሰራር የትስስር ሰነድ በማዘጋጀት ከባለ ድርሻ አካላት ጋር በመፈራረም ወደ ስራ የተገባ መሆኑ ይታወሳል። በመሆኑም በ2016 በጀት ዓመት ውስጥ የተከናወኑ ተግባራትን በመገምገምና የተሻለ አፈፃፀም ያላቸውን የስራ ክፍሎች እንዲሁም ተቋማት እውቅና እና ሽልማት የመስጠት መርሃ-ግብር ተካሄደ።

በመርሃ-ግብሩ የመክፈቻ ንግግር ያደረጉት የአዲስ አበባ ከተማ አስተዳደር ኢኖቬሽንና ቴክኖሎጂ ልማት ቢሮ ሀላፊ አቶ ሰለሞን አማረ የእንኳን ደህና መጣችሁ መልዕክታቸውን አስተላልፈው ቢሮው ከተቋቋመ አጭር ጊዜ መሆኑንና ነገር ግን ባለፈዉ አንድ ዓመት በርካታ ተግባራት መከናወናቸውን ገልፀው ለዚህ የስኬት ዓመት ከቢሮ ጋር በቅንጅት እየሰሩ ያሉ ተቋማት እና የአስራ አንዱ ክፍለ ከተማ ኢኖቬሽንና ቴክኖሎጂ ጽ/ቤት ሀላፊዎች ከፍተኛ ሚና እንደተጫወቱ አመላክተዋል።

አክለውም የወጣቶችን ዲጅታል ክህሎት ለማሳደግና የአቅም ግንባታ ስልጠና በመስጠት ስራና ሀብትን ለመፍጠር የሚያስችል የ5ሚሊዬን ኢትዮጵያን ኮደርስ ኢኒሼቲቭ ተግባራዊ እየተደረገ በመሆኑና በአንድ ወር ውስጥ 60ሺህ ሰዎች የተሳተፋበት መሆኑን ገልፀው ዘመኑ የሚፈልገው ብቁ ዜጋ ለመሆን ስልጠናውን በመውሰድ ተወዳዳሪ መሆን ይገባል ሲሉ መልዕክታቸውን አስተላልፈዋል።

የ8ዓመት ስማርት ሲቲ ስትራቴጂም ወደ ተግባር መገባቱንና ከባለ ድርሻ አካላት ጋር በቅንጅት በመስራት ከ8 ዓመት በ5 ወይም 6 ዓመት ለማጠናቀቅ ከፍተኛ ጥረት እንደሚደረግ አመላክተዋል። በመጨረሻም የዚህ እውቅና እና ሽልማት መርሀ-ግብር ዓላማ አንዱን ከሌላው ማበላለጥ ሳይሆን ተሳትፎን ማሳየት ላይ ያለመ መሆኑን በማመላከት መርሃ-ግብሩን በይፋ አስጀምረዋል።

የአዲስ አበባ ከተማ አስተዳደር ኢኖቬሽንና ቴክኖሎጂ ልማት ቢሮ ጽ/ቤት ሀላፊ አቶ ግሩም አብተዉ የ2016 በጀት ዓመት ቅንጅታዊ አሰራር እቅድ አፈፃፀም ሪፖርት ያቀረቡ ሲሆን በሪፖርቱ የውል ሰጪ ተልዕኮና አጠቃላይ ዓላማ፣ የትስስሩ አስፈላጊነት፣ የትስስሩ መርሆዎች፣ ዋና ዋና ቁልፍ ተግባራት አፈፃፀም፣ ያጋጠሙ ችግሮችና የክትትል ድጋፍ ግብረ መልስና ግምገማ ስርዓት ተካተዉበታል። በቀረበው ሪፖርት ላይ መሰረት በማድረግ በቢሮ ሀላፊ አቶ ሰለሞን አማረ አማካኝነት ውይይት የተካሄደ ሲሆን በውይይቱ በቅንጅትና ትስስር ሂደቱ የተስተዋሉ ተግዳሮቶች ከክፍለ ከተማ፣ ከግሉ ሴክተር፣ በቅንጅት ከሚሰሩ ተቋማት የተለያዩ ሀሳብ አስተያየቶች የተነሱ ሲሆን የተነሱ ሀሳብ አስተያየቶችን እንደ ግብአት በመዉሰድ ምላሽ ተሰጥቶባቸዋል።

በመጨረሻም በ2016 በጀት አመታዊ የማጠቃለያ ምዘና ውጤት የተሻለ አፈፃፀም ላላቸው የስራ ክፍሎች፣ የተሻለ የፕሮጀክት አፈፃፀም ያላቸው ካምፓኒዎች፣ ክፍለ ከተማዎች እንዲሁም በቅንጅት የሰሩ ሴክተሮች የእውቅና እና ሽልማት መርሃ-ግብር የተካሄደ ሲሆን በቢሮ ሀላፊ ማጠቃለያና ቀጣይ የትኩረት አቅጣጫ ማለትም የጳጉሜ ቀናት አከባበር፣ ስለሚከናወነው ችግኝ ተከላ እንዲሁም የግሉ ሴክተር ኢትዮ ኮደርስ ፕሮግራም ማህበረሰብን ተሳታፊ እንዲሆን እንዲያበረታቱ በማሳሰብ መርሃ-ግብሩ ተጠናቋል።

ወቅታዊና ተጨማሪ መረጃዎችን ለማግኘት ዌብ ሳይት (website): https://www.aaitdb.gov.et

ፌስቡክ (Facebook page) https://www.facebook.com/AAITDB

ኢሜይል (Email): aaitdb@aaca

---

Comments

Nothing was found.